[Volapük.com]  Kadäm Volapüka Domio
 
  

Statuds Volapükanefa

Kapits

1.0 Volapükamuf

1.1 Nem
1.2 Topät
1.3 Siämamäk
1.4 Fünadät
1.5 Yel Volapükamufa
1.6 Pük calöfik Soga
1.7 Funds

2.0 Zeils Soga

2.1 Konsefam e propagidam
2.2 Vestigam
2.3 Vobots nulik
2.4 Geb püka
2.5 Käl püka

 

3.0 Calans Soga

3.1 Cifal
3.2 Vicifal
3.3 Guvan
3.4 Calans votik
3.5 Slopans

4.0 Zeils Kadäma

4.1 Vobäd zeilas
4.2 Jaf vödas
4.3 Kleilükam dotas
4.4 Zep dabükotas
4.5 Limanatips Soga

 

5.0 Noganükam Kadäma

5.1 Limanam löpikün
5.2 Num kadämanas
5.3 Büsid kadäma
5.4 Sluds kadäma
5.5 Kadämans nekomik
5.6 Kadäm büik

6.0 Votükams statudas

6.1 Votükams zesüdik


I. VOLAPÜKAMUF

1.1 Nem

Sog Bevünetik Volapüka binon konlet utanas, kels löükons namis ad nämükön sevi okas e votikanas tefü pük bevünetik Volapük fa hiel Johann Martin Schleyer e ma revids ela Arie de Jong.

1.2 Topät

Topät calöfik Soga binon ladet Cifala.

1.3 Siämamäk

Sog e vobots onik pasevons dub siämamäk, in zän kela binon talaglöp blägik in mel vietik, ko liens stedik zänik; bal horitätik, votik penditik, e liens fol bofaflanü liens stedik: fol plo lunets krugöl zü povs e fol pro videts krugöl zü zänod. Zü vol in tan silablövik binons vöds blägik tonatas mayudik, sus talaglöp: VOLAPÜK, e dis talaglöp: MENEFE BAL PÜKI BAL. Val binon in lin sirkik blägik.

MENEFE BAL PÜKI BAL

1.4 Fünadät

Dät füna Soga Bevünetik Volapüka binon dät statuda at.

1.5 Yel Volapükamufa

Vobayel binon kaledayel.

1.6 Pük

Pük calöfik Soga binon Volapük.

1.7 Funds

Sog no dalabon fundis. Guvan begom lebonedis ad pelön frädis büka äsi seda gaseda e nunotas votik. Üf sog sludonöv ad primön dunotis, kels neodons moni, ozesüdos ad labön nemi dunotadilekana, mobis kleilik, täxeti, fonis monas pespelölis, e baiced Kadäma. Dü e pos dunot somik, dunotadilekan osedon Kadäme alyeliko nunodi dö proged e mons. Üf mons alyelik ad atos valik binonsöv plu ka yurods kiltum, ozesüdos, das Kadäm nemon monikontrolani nelivätik.

II. ZEILS SOGA

2.1 Konsefam e propagidam

Sog steifülon ad konsefön e propagidön sevädi, paki e gebi Volapüka da vol lölik.

2.2 Vestigam

Sog vestigon vobotis e dunis pasetikis Volapükanefa.

2.3 Vobots nulik

Sog kuradükon vobotis e dunis nulik in Volapük.

2.4 Geb püka

Sog gebon püki, lönedüköl oni pro neods timas nulik, as sam: medü jaf vödas nulik dub Kadäm Volapüka.

2.5 Käl püka

Ma vöds Cifala Johann Schmidt in pened privatik: „Vilobs kälön püki at leigoso äsä käloy vöna-Grikänapüki u vöna-Saxadapüki.“

III. CALANS SOGA

3.1 Cifal

Cifal binon cif löpikün Soga. Dasumon libaviliko cali cifala e vobon lanäliko ad fümükön zeilis Soga. Dugon e pladulon mufi. Dispenon statudis e sludis Kadäma, diplomis xamäbas äsi bligis votik calöfik Soga. Dakipon baläti Volapüka e Volapükamufa. Dilekon kadämi. Cifal kanon, ko baiced plunuma Kadäma, säcälön limani Kadäma. Votaflano, if kadämans cedons, das cifal no fölon bligis oka, plunum onas dalabons gitodi ad säcälön oni e ad dünükön fovani.

3.2 Vicifal

Pavälon fa Cifal ko baiced Kadäma; preparon oki ad plaädön Cifali, u nelaidüpiko u laidüpiko, ko slud baicedik Kadäma. Noganükon kolkömas Volapükanefa e yufon Cifali in valem.

3.3 Guvan

Pavälon fa Cifal baicedü Kadäm. Kälon konömi Soga e düno as sekretan e redakan gaseda calöfik Soga, papüböla dub meds bükik e leäktronik.

3.4 Calan votik

Calan nelaidüpik povälon ma slud Kadäma.

3.5 Slopans

Slopan binon men alik, kel vipon slopön zeilis Soga e panemön Volapükan.

IV. ZEILS KADÄMA

4.1 Vobäd zeilas

Kadäm dabinon ad fovön zeilis Soga Bevünetik Volapüka.

4.2 Jaf vödas

Kadäm dabinon ad calöfiko jafön e dälädön vödis nulik, e kleilükon sinifis vödas nulädik, kels no nog dalabons leigafomis Volapükik.

4.3 Kleilükam dotas

Kadäm dabinon ad kleilükön pünis dotik tefü vöds e gramat Volapüka.

4.4 Zep dabükotas

Kadäm dabinon ad zepön tidodemis, vödabukis e xamis Volapüka.

4.5 Limanatips Soga

Kadäm dabinon ad sludön tefü stips limanama Soga, e, medü Guvan, ad glidön limanis nulik pötik.

V. NOGANÜKAM KADÄMA

5.1 Limanam löpikün

Limanam löpikün Kadäma binädon me Cifal, Vicifal e Guvan.

5.2 Num kadämanas

Num kadämanas binon jöl. Utans, kels sevons Volapüki, e kels edabükons literati tefik, kanons pakomandön as kadämans baicedü Cifal.

5.3 Büsid kadäma

Büsid Kadäma podunon u medü pot kösömik, u medü pot leäktronik.

5.4 Sluds kadäma

Sluds Kadäma popübons fa Guvan dub med u meds ya pemäniotöls (bagaf 3.3 löpo).

5.5 Kadämans nekomik

If kadämans no komons u spodiko, u pösodiko, u vögo, sluds pomekons fa slopans komöl.

5.6 Kadäm büik

Kadäm dabinik Volapüka fovon Kadämi, kel pebestidon pötü Dalebüd Cifala (Diläd III) dätü 1934, tü del balid yanula.

VI. VOTÜKAM STATUDAS

6.1 Votükams zesüdik

Votükams mögädo zesüdiks statudas at polonülons me dalebüd fa Cifal baicedü Kadäm Volapüka.


Se Vög Volapüka 2007, Nüm: 1, Pads: 2-8.

©2004-2012 Ralph Midgley and Michael Everson
Hosted by Evertype